英國留學 『代表作』

英國留學 靠哂升學介紹所『累事』

舊年年尾，由老友介紹照顧一家三口，從北京來英國留學嘅一對小姊弟和他們的媽媽。亦收到部份有關學校方面嘅資料，知道學校係在英國中部伯明翰再往北上大約一個鐘頭車程左右嘅一個小鎮。我亦將需要做嘅都已經安排好，一切準備就緖這一個星期嘅工作。

接機當日先安排他們一家四口在倫敦休息一晚，多咗一位朋友隨團照顧佢哋。第二日早餐後出發北上，晚飯前已經到達目的地 Cannock。佢哋個朋友只係多口問句可唔可以先去學校睇一吓，雖然我好相信學校係唔會開門，但亦都應該去睇吓附近嘅環境。何我早已經將學校地址輸入衛星導航，所以去睇睇亦難，兜兜轉轉個幾鐘都見唔到學校，明明衛星導航指定地址已經到達，但係是一間超市嘅停車場，望來望去真係無處似學校，更聽講話呢間係乜乜貴族學校，開始有d担心自己擺烏龍攞錯地址，最後索性落車問人。唔問就點會知原來超市停車場入口旁邊有度半開半掩嘅鐵閘，裏面睇落好似地盤一樣嘅就係呢間名校。學校我見得多，咁樣嘅學校真係第一次，的確大開眼界。既然嚟到我哋一團人就入去校園參觀吓喇。停留咗差不多一個鐘，但好可惜一個人都冇。及後我哋入住預先安排好嘅酒店，在晚飯其間佢哋最後亦都忍吾住問我對這間名校的睇法，我亦無須客氣，實話實說。

呢件事情跟住落去的發展和結果點樣再唔重要，但只希望各位家長在送子女到外國留學前，要真係清清楚楚知道嗰間學校嘅一切資料，唔可以單單相信和依賴升學介紹所。最近呢10幾年來，英國大部份嘅私立中小學校都依靠收海外留學生嚟得到經濟上的支持，每年好多學校到香港，中國及亞洲各地舉辦招生會大賣廣告，和委託當地升學介紹所負責收生。當然收得越多越好喇。我相信介紹所職員對外國學校嘅資料都係一知半解，可能連邊個國家城市方向都未搞得清楚，不過做生意呀嗎。為求年底花紅多d，真係乜都講得出口。大部份家長都希望自己子女可以入讀名校，所以什麼名校，乜乜貴族學校等等就會成為家長選擇嘅第一目標。

話你知英國正規嘅貴族學校唔多，要入讀呢類名校真係唔容易，但係都有辦法嘅。英國教育制度依然停留在50年代，記住唔好理佢係貴族名校;私校;抑或係公立學校，所教嘅;讀嘅;考嘅都係一模一樣。要知道普通私校都會出名人，公立學校都會出首相。送子女到外國留學嘅主要目的係比機會佢哋學識自立，待人處事。選擇學校嘅時候，最好帶同子女先去睇吓附近嘅環境，合適與否是附於子女自己，各位家長理應只能從旁提供意見。因為之後幾年嘅學校生活係子女而唔係家長呀。萬一需要轉校的話，樣樣野就要從頭嚟過喇。

番轉頭講講上面嗰單嘢，這對小姊弟最後都轉咗校，話就易囉，要利用佢哋家長在英國這段短時間，跑來跑去，電話嚟電話去，政府各部門詢問學生簽證轉校手續，一早排隊攞表格，填表格，做翻譯等等，等等。我亦最後照顧咗佢哋一家三口個幾月，做咗兩個學生嘅臨時監護人，學生銀行戶口擔保人。呢件事亦算係我照顧留學生以來最頭痛嘅代表作啦。

本文章由博主個人原創, 擁有該文章之版權